O deputado do BNG no Parlamento de Galicia Daniel Pérez continúa a percorrer os centros de secundaria de Carballo para coñecer de primeira man como están a vivir este “caótico e improvisado” inicio de curso. Onte, acompañado polo alcalde, Evencio Ferrero, e a concelleira Milagros Lantes, que representa ao Concello no consello escolar, achegouse ata o IES Monte Neme, onde mantivo unha xuntanza coa directora, Charo Couto, e puido saudar a outros membros do claustro.

Imaxe da xuntanza coa directora do centro

Daniel Pérez comprobou unha vez máis como os equipos directivos dos centros de ensino teñen que afrontar sen axuda da Administración competente, a Xunta de Galicia, e con poucos medios humanos e materiais as novas necesidades derivadas da COVID-19.

No IES Monte Neme tampouco houbo vacacións este ano, porque cando estaba todo listo para comezar o curso segundo o protocolo inicial da Consellería de Educación, a mediados de setembro chegou a última versión, que obrigou a modificalo todo.

No centro carballés desapareceron espazos de uso común como a biblioteca para poder habilitar máis aulas e evitar, na medida do posible, o uso de mamparas. Grazas á existencia de catro edificios independentes foi posible situar separadamente en cada un deles os distintos tipos de ensinanzas, evitando deste xeito contactos e limitando os efectos dun hipotético contaxio. As entradas e saídas fanse de xeito gradual e en determinadas materias de FP impártense clases semipresenciais, nalgún caso dotando de equipos do propio centro ao alumnado que carece deles. En canto á limpeza, aínda que dende o Monte Neme se pediu un reforzo dado o incremento do traballo que supón a prevención da COVID-19, a Xunta non aumentou o persoal, senón que repartiu as catro traballadoras entre a mañá (unha) e a tarde (tres).

Os representantes do BNG agradeceron especialmente ao profesorado do IES Monte Neme a fabricación de pantallas protectoras durante o estado de alarma

O deputado do BNG púxose a disposición da dirección para trasladar ao Parlamento de Galiza as necesidades que poidan xurdir e, sobre todo, expresou o seu agradecemento ao profesorado e a toda a comunidade educativa polo esforzo realizado “para que o curso puidese saír adiante”.

O alcalde, pola súa banda, explicou algúns aspectos que se abordaron no Consello Escolar Municipal celebrado esta semana, e Milagros Lantes deu a coñecer unha proposta para mellorar a accesibilidade ao instituto.